Hriatna buhzem Dist. Library mi taima ten an chhawr mek zel

Lunglei Dist. chhunga lehkhabu awm tamna ber Dist. Museum Saikuti hall chungber a awm mekah hian lehkhabu chi hrang hrang 22082 tunah hian an nei mek a, Doctorate Degree lak nan a hmang te pawh an awm tawh niin Counter Attendant Pi K. Lalsangzuali chuan kan palai zawhna chhangin a sawi.
           Library-ah hian lehkhabu hrang hrang College zirlai bakah  Thesis ziah nana  tha tak tak te a awm a, heng bakah hian Megazine Periodical hrang hrang te chhiar tur a awm a, Lunglei tualchhung chanchinbu zawng zawng an la (Subscribe) kim vek bawk. Library a lehkhabu hawh tur hian member nih a ngai a,  member ni tur hian Form siamsa Rs 10 a leiin Rs 100 security-ah dah a ngai a, passport size thlalak 2 thil tel a ngai bawk. Library dang ang bawkin ni 7 chhung a hawh theih a, hemi hnuah hian lehkhabu hawh duh chuan a renew zel theih a ni.  Tuin dinhmunah member hi Puitling 104 awmin naupang nen avaiin mi 597 an awm mek a ni.
    Tunah hian Pi . K. Lalsangzuali chuan he Library tlawhtu tam ber chu School naupang an ni tih a sawi a, anni bakah hian College zirlai lehkhabu a chikima  awm bawk avangin College student te hian an Exam dawnah chuan lehkhabu an hawh nasa thei hle niin a sawi bawk. Anni bakah hian tu tenge Library hi hmangtangkai leh ber ang ti a zawhna chu Entrance Exam tur te, MCS etc Exam tum te hian an tlawh thin tih a sawi a, hengbakah hian PhD. Doctorate Degree lak nan te pawh he Library hi hmang an awm ve nual tawh tih sawiin tunah pawh hian Doctorate Degree lak tum te chuan an hmang mek niin a sawi bawk.
    He Library atang hian Govt. J. Buana College Lecturer Dr. Sinha(Pol Sc), Dr. J. Zorema(History), Dr. Lalzuiliana (Eco) te pawh a chhawr nasa pawl an nih thu leh he Library product hi an ni kan ti ve ngam tiin a sawi. Dist Library Lungleiah hian Pu H. Rotluanga chu Librarian niin Counter Attendant bakah hian IV Grade 2 awmin Staff 4 in an enkawl mek  a ni. A hmun a laili a, mahse a reh tho bawk si a, Lunglei thalai te hian Finna chawkluh nan hman tangkai tum deuh deuh sela ZUNZAM Daily chuan kan duhsak hle.