My Name is Khan a lar zel

Tihchhuah a nih hnu kar khat lekah Shah Rukh Khan film thar 'My Name is Khan' chuan khawvel pumah dollar makta-duai 18 a hlawh der tawh mai!
He film-ah hian Kuch Kuch Hota Hai-a a chanpui Kajol nen an dang dun leh a, Rizwax Khan lemah changin vai film dang ang bawka love story a ni a, America-ah te zinkual a, hun hmangin a nuna ro hlu ber a hmangaih Mandira (Kajol) nena hmangaihna hlut zia an tarlanna leh chi inthliarna lam duh lohna lantirna film a ni.
Mumbai-ah kar kalta zirtawpni khan tichhuah a ni a, Maharashtra, Gujarat, Indore leh khawvel hmun hrang hrangah a hit nghal hle.
Tarlan tawh angin he film hian tihchhuah a nih hma khan chanchin a nei hat a, Shiv Sena ten dodalin SK thusawi an enghelh vang a ni pakhat a, a thusawi sut leh tura an tih chungchangah Shah Rukh a tang ve laklawh tawh si a, an buai chho ta a ni.
Shah Rukh hian Indian Premier league-a Pakistani player an telh theih loh chungchang sawichhuakin tel ve tawh se a tih thu leh an thlavang hauhna thu a sawi a, hei hi Bal Thackery pawl Shiv Sena chuan an duh lo tak zet a, SK-an a thusawi a zuk lo a nih chuan Mumbai-a chhuah an phal loh tur thu sawiin a film poster leh banner te pawh an pawtchhe nasa hman hle a ni. SK hian US leh Britain-ah a film tihchhuah a nih hma hian promote turin a kal a, a haw hlim pawh airport-ah security 500 rual velin an veng tawp mai.
He film hi kar kalta zirtawpnia tihchhuah a nih d^wn khan Berlin International Film Festival-ah ticket hralhchuah a nih hnu second 5 lekah a fai nghal vek! Berlinale authorities te chuan ticket hralh a nih hnu minute 5-a lei tum lo kalte chuan an chang tawh lo an ti a, he film ticket hi Internet-a e-Bay-ah lilam a ni a, 1,000 euros (Rs.60,000) velin an chhang!