Nu ber len chhuah fo CM nupuiin tha ti lo

Aizawl 8.03.’10:Khawvel pum huap Hmeichhiate Ni (International Women’s Day) chu Aizawlah vawiin khan MHIP Gen. Hqtrs huaihawtin Chanmari YMA Hall-ah hman a ni a. Indian Society on Tobacco and Health Mizoram Chapter President leh Mizoram CM thiannu Pi La Riliani’n he hun hi khuallian niin a hmanpui. Khuallian Pi Lai Riliani chuan India rampum huap leh Mizo hnam bil zingah hmeichhiate thlauhthlak an nih thin dan a chinchhuaka sawiin tunlai khawvelah erawh chuan hmeichhiate hian mipate tlukpui chanvo leh mawhphurhna kawng tinrengah an nei chho ve ta hi thil lawmawm tak ani a ti a. Inchhungkhura nute mawh phurhna pawimawhzia sawiin nu ber pawn chhuah tam lutuk avanga chhungkuain a tawrh theih dan lakah fimkhur a tul thute a tarlang. Mizo hmeichhiaten zirna, sumdawnna, sorkar hna thlenga mipate chanvo an tawm phak tawh mek lai hian politics leh kohhran huangah erawh hmasawnna tur a la awm thu tarlangin India Sorkar rorelna sang berah hmeichhiate seat za zela sawmthum pathum (33%) hauhsakna tur bill putluh ani mek chu thil lawmawm tak a ni a ti a. He bill hi pass anih hunah phei chuan Mizoramah ngei pawh hmeichhe MLA engemawzat neih theih a ni ve ang a, chuvangin hmeichhiate inbuatsaih a pawimawh a ni a ti.Mizo hnam tlemte leh intodelhlo tak kan ni chunga sakhaw khat, tawng khat hmang kan nih avangin mizo hmeichhiate tan remchanna thui tak awm hi hmang thiama midangte tana malsawmna ni turin MHIP Member zawng zawngte a sawm a, thil thalo leh dik lo pawmzam zawnga hmasawnna hi kan do dal tlat a tul a ni a ti.Kumin he ni thupui Equal Right, Equal Opportunity chungchang pawh tarlan niin programme hlimawm taka buatsaih a ni.He hunah hian mi pawimawh engemawzatin thu an sawi bawk a ni.