Ruihhlo leh Mizo thalaite

Anti Narcotic Squad, Mizoram Excise & Narcotics hnuaia mite chuan nimin piah khan Tuikual South-ah ruihhlo chi hnih Spasmo Proxyvon Capsule 547 leh Spas Capsule 85 an man a, a neitu nia puhte pawh man telin thubuai an siamsak a ni.

Mizoramah hian damdawi ruihhlo kan buaipuina hi thang khat lian zet chu a ni ve tawh a. A bik takin Spasmo Proxyvon ruihhlo atana hman hi a la rei lutuk loh aiin kan chhiatpui nasa a, thalai tamtakin an tihpui tawh a, ramtuileiloin mi eng emaw zah an awm phah tawh bawk a. Eng emaw hun lai phei kha chuan eng emaw ruih kha intihhmuh ang zawngin a kal emaw tih mai tur a ni a, sorkar leh khawtlang tan pawh buaipui tham takmeuh a tling a, CYMA pawhin ‘Ruihhlo do kum’ hial puangin thawm a lian hle a nih kha.
Kha tih laia YMA hmalakna kha a hun lai chuan sawisel leh dodal pawh a hlawh viau a, chu tih laiin tantu pawh an tam em em tho. Tun dinhmun atanga ngun taka han thlir kir hian Mizorama ruihhlo hluar zel tur chu YMA khan a brake a rap ngei tih erawh chu phat rual a ni lo. YMA-in kum puana a neih hma leh a neih hnu chu dan dang tak a ni. YMA khan tih fuh tawk loh leh dai pelh palhte pawh a nei tih chu phat rual a awm lo va, chu tichung chuan YMA ruihlo do kha a hlawhtling tih loh rual a ni lo. Ruihhlo man tur tawk hi chu a awm reng ang, hei hi chu a lo luh tawh chuan a nuai bo lam hi chu thil harsa lutuk a ni. Zun thlum natna an sawi ang deuh a ni a, a tih dam lam aiin a control lam hi ngaihpawimawh ngai a ni.

Mizo thalaite pawh hma kan sawn chho zel a, kan nun phung hian ruihhlo hi zawi zawiin a nek tawm zel ang tih beisei ila. Tunah pawh hian veng hrang hrangah ruihhlo ti khawtlangina han buaipui ngai hi chu an tlem tial tial emaw ni chu aw a tih theih. A buaipui ngaihote pawh hi hmana buaipui thinate bawk kha an niin alang a, lo ching tharte chu lo awm ve zel bawk mah se tun hmaa phung velh ang maia kan pung phut phut ang kha chu kan ni lo tial tialin alang. Thalaite zingah pawh rilru puitling taka thil thlir kan thiam chho tial tial niin alang a, hengte avang hian hma kan sawn pawh a ni thei ang. Ruihhlo laka kan thalaite an tal luh lohna tur hian a pawimawh ber nia lang chu chhungkaw inenkawlna hi a ni a. Chhungkaw ngaihpawimawhna kawngah hian kan pian thar chhoh zel hi a pawimawh takmeuh meuh a ni.