Andy Murray a rawn chak chho nghal

Andy Murray chu Australian Open final-a a chak loh hnuah Dubai Open lamah chuan a che tha tan hle a, Russian tlangval Igor Kunitsyn chu awlsam tak 6-2,6-3 in a rawn hneh a, second round a lut nghal der mai. World No 4 hian break point vawi 9 lai a la bawk. A khingpui Russian pa hi World No 111 a ni mek thung. Hnehna a chan chungchangah British No I Murray chuan “ Match kan tan chiah khan ka ke artui hi a rawn na zawk a, heibakah tan atanga reiloteah khan thawk harsa ka ti a, kha kha a chhan chu a hmalam a practise ka neih that loh vang a ni” tiin a sawi. Hetihlai hian second seed Novak Djokovic, Roger Federer a inhnuhdawh avanga highest seed chuan a khingpui Garcia Lopez chu 6-4,6-4 in awlsam takin a lo hneh tawh bawk. Australian Open a a chakloh atang khan Murray hian Premiere League football inkhel lam en a uar hle a, Federer lak a a chakloh rilru tihdam nan Football en lamah a ramtang ta zawk a, heivang hian a fitness-ah pawh a chhiat phah deuh niin amah hian a sawi nghe nghe a ni.